ROGER MILLA AISHUTUMU MOROCCO!! AFCON 2015:

LEJENDARI wa Cameroon Roger Milla ameshutumu mapendekezo ya Morocco ya kutaka Fainali za Kombe la Mataifa ya Afrika, AFCON 2015, ziahirishwe kuchezwa Nchini mwao kutokana na mlipuko wa Ebola.

Fainali hizo zitakazoshirikisha Nchi 16, wakiwemo Wenyeji Morocco, zimepangwa kuanza Januari 17 lakini Morocco wameomba ziahirishwe kutokana na mlipuko wa Ugonjwa wa Ebola uliozikumba Nchi kadhaa huko Afrika Magharibi na kuua Watu zaidi ya 4,400.

Lakini Milla, Staa wa Cameroon alieng’ara mno kwenye Fainali za Kombe la Dunia za Mwaka 1990, amesema Morocco inaficha kitu na Ebola ni kisingizio tu.

Milla, akiongea Mjini Yaounde Juzi Jumatano, amesema: “Nimefuatilia hili na najiuliza kwa nini Morocco ichukue hatua hii. Sidhani kama wanaogopa Ebola. Nadhani wao wanaficha kitu. Bora wawe wa wazi tu.”

Vile vile Roger Milla alihoji ikiwa CAF itahamisha Fainali hizo kutoka Morocco Nchi hiyo itafanywa nini na kama Mwenyeji mpya atapewa nafasi ya kushiriki moja kwa moja Fainali.

Msimamo wa Roger Milla unafana na ule wa Mdadisi mmoja wa Soka ambae ameshangazwa na jinsi AFCON 2015 kushinikizwa kuahirishwa kwa ajili ya Ebola wakati Mashindano ya FIFA ya Klabu Bingwa Duniani yanayotarajiwa kuanza Nchini Morocco Desemba 10 na hakuna yeyote aliesema lolote.

Hivi sasa AFCON 2015 ipo hatua ya Makundi ili kupata Nchi 15 ambazo zitajumuika na Morocco kucheza Fainali na Mechi za Makundi zinatarajiwa kumalizika Novemba 17.

Wakati utata huu ukiendelea, CAF imedokezwa kuongea na Nchi kadhaa zikiwemo Ghana na Afrika Kusini na Nchi nyingine 5 kuwa Wenyeji wa dharura ikiwa Morocco watajitoa.
CAF wanatarajiwa kutoa msimamo wao baada kukutana na Morocco hapo Novemba 3.