Sababu za watu kuwa na wivu katika mahusiano,jinsi ya kuushinda wivu katika mahusiano

  MARA ya kwanza unapoanza uhusiano na mwenza wako ambaye mnapendana, mnapoangaliana machoni hujiona kama mpo wenyewe katika ulimwengu huu.

Lakini kadri uhusiano huo unavyozidi kukomaa na kuanza kuitana wapenzi au wenza ndipo ukweli unapojidhihirisha kuwa hamko wenyewe katika dunia hii bali pia kuna watu wengine.

Sasa hapo ndipo huwa na tatizo, je, hao watu wengine wanaolizunguka penzi lenu ni wa kuogopwa? Wanahatarisha kitu chochote katika uhusiano wenu?

Tunapokuwa katika uhusiano uliokomaa, mara nyingi tunadhani kuwa muunganiko na upendo tulionao na wenza wetu ni imara kiasi cha kutulinda na hatari za watu wengine wa nje ya uhusiano huo.

Hivyo katika uhusiano wa aina hiyo, inapotokea mmoja wa wenza hao akawa anawaona watu wa nje wanaowasiliana na mwenza wake ni hatari katika uhusiano huo, hiyo ni ishara kuwa wivu amechukua nafasi yake.

Mwandishi mashuhuri na maarufu duniani Shakespeare aliwahi kuuita wivu kuwa ni jitu lenye kutisha lenye macho ya kijani ambalo likipata nafasi ya kuingia kwenye uhusiano huzama na meno yake na kuuchana chana.

Ukweli kuhusu wivu ni kwamba kama kuna mwenza mmoja anakumbwa na ugonjwa huo, ni ishara kuwa hana imani na mwenza wake yaani uaminifu wake ni wa mashaka.

Lakini siku zote ukosefu wa uaminifu na chanzo cha wivu huwa na sababu kama vile mwenza mmoja kutojiamini mwenyewe na kumuendea kinyume mwenza wako hivyo na wewe kuwa na wasiwasi labda na yeye kakufanyia ulivyomfanyia.

Lakini sababu kubwa zaidi ni watu wengi kwenye uhusiano kutokutengeneza mipaka salama ya uhusiano wao, jambo ambalo linasaidia kujenga ukuta katika penzi pamoja na madirisha ambayo ndiyo yatakayowaruhusu wengine kushirikishwa.

Na hapo mkumbuke si kujenga ukuta wenye milango ambayo itawaruhusu wapenzi wa nje wenye ushindani kuingia na kuvuruga uhusiano huo. Hali hiyo inasababishwa na pande zote mbili kutokujua ni kitu gani kinakubalika ndani ya uhusiano huo na kisichokubalika.

Na hapo ndipo mawazo mabaya hujengeka ambayo yanazaa wivu, mawazo kama vile mwenza wako anakudanganya ana uhusiano na mtu mwingine nje ya uhusiano wenu.

Jambo la muhimu hapa ni kutambua mambo yanayomfanya mtu avamiwe na ugonjwa wa wivu ili uweze kupambana nayo.

Baada ya hapo peleka mawazo yako katika kujenga uaminifu kwenye uhusiano ulionao, ikibidi hata kupata ushauri kwa wataalamu. Lazima wote wajifunze namna ya kuwekeana mipaka katika uhusiano, hiyo ikimaanisha kuwa kila mmoja aheshimu mipaka ya uhusiano wa mwenzake.

Kadri uaminifu unavyojengeka ndivyo mnavyotambuana na kugundua ni vitu gani salama katika uhusiano wenu, pamoja na hayo uhusiano unapokomaa na kuleta matumaini pia mtahitaji kushirikisha dunia.