KISA CHA KWELI MZAZI AELEZEA :‘Siwezi kusahau mwanagu alivyokatwa uume’

• Asema bado anashangaa hukumu ya mahakama na jopo la madaktari dhidi ya mhusika

 Ni furaha ya kila mzazi kupata mtoto mwenye siha  njema na mtimilifu wa viungo. Lakini ilikuwa bahati mbaya kwa Mario Sanga, ambaye licha ya kubarikiwa kupata mtoto wa kiume mwenye afya  bora, aliyekamilika, kufumba na kufumbua mtoto huyo amepata ulemavu ambao ni adhabu  pia upungufu mkubwa kwa mwanaume yeyote duniani.

Ulemavu huo si kama ule wa kukosa mikono, miguu, macho au ulemavu wa ngozi bali     ni  kitendo cha mtoto huyo kukosa uume baada ya kukatwa na daktari wakati wa tohara.

Jambo hilo pengine litamkosesha mtoto huyo kuwa baba na kufurahia maisha ya ndoa kama wanaume wengine.

Ilivyotokea

Sanga, mkazi wa Mang’ula, Wilaya ya Kilombero, mkoani Morogoro anaeleza kuwa siku ya tarehe 15 ya Juni mwaka 2012, alimpeleka mtoto wake (jina linahifadhiwa) hospitali kwa ajili ya kufanyiwa tohara.

 Alipofika hapo kama ilivyo ada, alipokelewa  na madaktari ambao walimchukua mtoto na kumwingiza katika chumba maalum kwa ajili ya tohara. “Ilituchukua nusu saa tu, baada ya kuingia ndani na mtoto na kuanza kumfanyia tohara, baadaye daktari alitoka na mtoto, lakini alikuwa akitokwa damu kwa wingi. Kwangu mimi lile jambo halikuwa la kawaida,” anasema Sanga.

Anasema kuwa daktari wa hospitali hiyo, aliyemtaja kwa jina la Castory Magoha, hakuwaeleza chochote zaidi ya kuwaambia kwamba mtoto wao ametokwa damu nyingi na  kuwaagiza kuwa endapo damu itaendelea kutoka wamrudishe hospitali hapo.

Kwa maelezo ya Sanga, damu iliendelea kumtoka mtoto wao kwa wingi na walimrudisha  hospitali na daktari aliwapa rufaa ya kwenda kwenye hospitali ya daktari  mwingine aliyetajwa kwa jina la Mgonyi ambaye kwa sasa ni marehemu.

Sanga akiwa na mtoto wake walikwenda hadi kwa daktari waliyeelekezwa na walipofika, Dk Mgonyi alimchunguza mtoto, bila kumpa tiba yoyote na kuwaambia warudi kwa daktari aliyemfanyia tohara.  “Tuliporudi kwenye hospitali ya kwanza, Dk Magoha alituandikia sindano na kutuambia  turudi tena baada ya wiki mbili,  wakati huo mtoto likuwa akilia sana kwa maumivu,” anasema.

Anabainisha kuwa sindano zilisaidia kukausha damu, ingawa umbile la mtoto lilionekana haliko sawa ambapo aliamua kumrudisha kwa Dk Mgonyi kwa uchunguzi zaidi.

“Dokta  (Mgonyi) safari hii hakutuficha, alituambia kuwa mtoto wetu amekatwa uume, yaani kichwa chote kimeondolewa na alitueleza wazi kuwa, ukataji wa Dk  Magoha ulikuwa na matatizo, ameukata uume wa mtoto badala ya kufanya tohara ya kawaida,” anasema.

Baada ya kugundua hilo, Sanga aliamua kufungua kesi katika  Kituo cha Polisi cha Ifakara na baada ya kesi kunguruma kwa miaka mitatu, lakini hukumu ilionyesha kuwa Dk Magoha hana kosa. Hata hivyo, Sanga hakukubali, aliamua kufungua kesi nyingine ya madai ya fidia kutokana na daktari huyo kuonyesha dalili za kukiri kosa.  Kabla ya hapo, Sanga anaeleza kuwa Dk  Magoha alimfuata nyumbani kwake na kutaka walimalize tatizo hilo kwa kumlipa fidia ya Sh5 milioni.

“Wakati kesi ikiwa mahakamani, Dk Magoha alikuja nyumbani, akaniambia tusameheane na anipe Sh5 milioni. Mimi nilimkatalia na tukaendelea na kesi, nikashangaa eti ameshinda,” anasema.

Dk Magoha amshangaa Sanga

Mwananchi lilipozungumza na Dk Magoha anayedaiwa kumfanyia tohara vibaya mtoto huyo, alidai kwamba  mtoto wa Sanga alizaliwa akiwa na upungufu katika kiungo hicho, ambao kwa kitaalamu unajulikana kama ‘congenital physical malformation’.

 Dk Magoha alisema hata mahakama ilishatoa uamuzi na jopo la madaktari liliketi na kukubali kuwa tatizo la mtoto wa Sanga ni la kuzaliwa nalo.

“Namshangaa, (Sanga), anaendelea na suala hilo, pengine anataka kunichafua kwa sababu ninachojua ni kwamba mahakama imeshatoa maamuzi kuhusu hili,” anasema na kuongeza kuwa, Sanga mwenyewe anafahamu kuwa mtoto wake ana tatizo hilo na wakati walipompeleka tohara alikiri kuwa hana maumbile ya kawaida.

 Hata hivyo, Sanga anasema endapo mtoto wake angekuwa na tatizo la kimaumbile, angefahamu mapema kwani alizaliwa kwenye hospitali kubwa ya Mtakatifu Francis ya Ifakara mkoani Morogoro.

Anaweza kupona?

Pengine tatizo la mtoto wa Sanga linaweza kupata suluhisho kwani, wataalamu wa Chuo Kikuu cha Stellenbosch nchini Afrika Kusini, walifanikiwa kupandikiza uume kwa kijana wa miaka 21, aliyekatwa uume baada ya kufanyiwa tohara vibaya, akiwa na umri wa miaka 18.  Kijana huyo, alifanyiwa vibaya upasuaji huo na kusababisha sehemu ya uume huo kuoza.

Kiongozi wa upasuaji huo, Profesa Andre van der Merwe, alisema upasuaji huo  uliodumu kwa saa tisa, ulifanyika katika Hospitali ya Tygerberg, Cape Town.